სიმპტომები

როგორც წესი, საშვილოსნოს ყელის პათოლოგიები უსიმპტომოდ ვითარდება, ამიტომ ჟორდანიას კლინიკის გინეკოლოგები გირჩევენ წელიწადში ერთხელ მაინც აუცილებლად გაიაროთ პროფილაქტიკური გამოკვლევა, რადგან დროული დიაგნოსტირება უზრუნველყოფს სწრაფ და ეფექტურ მკურნალობას. დაავადების შესაძლო კლინიკური გამოვლინებებია:

• უხვი პათოლოგიური გამონადენი საშოდან უსიამოვნო სუნით, სისხლის ან ჩირქის მინარევებით;
• დისკომფორტი და ტკივილი მუცლის ქვედა არეში;
• სისხლიანი გამონადენი საშოდან სქესობრივი აქტის შემდეგ.

საშვილოსნოს ყელის ჭეშმარიტი ეროზია

საშვილოსნოს ყელის ეროზია ხასიათდება საშვილოსნოს ყელის ლორწოვანი გარსის სტრუქტურის დაზიანებით და მიეკუთვნება დაავადებათა კეთილთვისებიან ჯგუფს. საშვილოსნოს ყელის ჭეშმარიტი ეროზიის გამომწვევი მიზეზები შეიძლება იყოს: სასქესო ორგანოების ანთებითი დაავადებები, ინფექციები, მექანიკური (აბორტი, მშობიარობა, უხეში სქესობრივი კავშირი) და ქიმიური (საპონი, წამლები, მჟავები) დაზიანება, ესტროგენ-დეფიციტური მდგომარეობები (მენოპაუზა, ხელოვნური მენოპაუზა და ა.შ).

საშვილოსნოს ყელის ექტროპიონი

საშვილოსნოს ყელის ექტროპიონი არის ენდოცერვიქსის - საშვილოსნოს ყელის არხის ეპითელიუმის ამომფენი უჯრედების ევერსია საშოსმხრივ ნაწილზე. ძირითადად დაკავშირებულია ესტროგენის მომატებულ დონესთან სისხლში და გვხვდება მოზარდებში, ორსულებსა და პაციენტებში, რომლებიც იღებენ კომბინირებულ ორალურ კონტრაცეპტივებს.

საშვილოსნოს ყელის დისპლაზია

საშვილოსნოს ყელის დისპლაზია მიეკუთვნება კიბოსწინარე დაავადებათა ჯგუფს, რომელიც ხასიათდება საშვილოსნოს ყელის ზედაპირულ ეპითელიუმში პათოლოგიური უჯრედების გაჩენით. ის შეიძლება იყოს: მსუბუქი, საშუალო და მძიმე. საშვილოსნოს ყელის დისპლაზიის ძირითადი გამომწვევი მიზეზი არის HPV (ადამიანის პაპილომავირუსი), კერძოდ, მაღალონკოგენური ქვეტიპები - HPV 16 , 18, 31 და ა.შ. საშვილოსნოს ყელის დისპლაზიის განვითარების პროვოცირება ასევე შეუძლია სქესობრივი გზით გადამდებ ინფექციებს, იმუნიტეტის დაქვეითებას, თამბაქოს მოხმარებას, რადიაციას და ა.შ. არასაკმარისი ან არასწორი მკურნალობის შემთხვევაში, საშვილოსნოს ყელის დისპლაზია შეიძლება გადაგვარდეს საშვილოსნოს კიბოდ.

რა არის ადამიანის პაპილომა ვირუსი?

ადამიანის პაპილომა ვირუსი არის გავრცელებული ინფექცია, რომელიც ყველაზე ხშირად აზიანებს ახალგაზრდებს. გადადის ინფიცირებული ადამიანის ლორწოვან გარსთან კონტაქტით, ყველაზე ხშირად სქესობრივი კონტაქტით. არსებობს 100-ზე მეტი HPV ქვეტიპი, მათგან ზოგი იწვევს გენიტალურ მახვილწვეტიან და ბრტყელ კონდილომებს, ზოგი კი საშვილოსნოს ყელის დისპლაზიას და კიბოს.

დიაგნოსტიკა

წარმატებული მკურნალობის მთავარი პრინციპი ზუსტი დიაგნოზის დასმაა. ჟორდანიას კლინიკაში საშვილოსნოს ყელის პათოლოგიების დიაგნოსტიკისთვის იყენებენ: გინეკოლოგიურ გამოკვლევას, ვიდეო კოლპოცერვიკოსკოპიას, მცირე მენჯის ღრუს ორგანოების ულტრაბგერას და ლაბორატორიულ ტესტებს ( HPV გენოტიპირება, საშოს ნაცხის ციტოლოგიური გამოკვლევა - პაპ ტესტი, ქსოვილების მორფოლოგიური გამოკვლევა (ბიოფსია).

მკურნალობა

ჟორდანიას კლინიკაში დიაგნოზის დაზუსტებისთანავე ირჩევა საშვილოსნოს ყელის დაავადების მკურნალობის ინდივიდუალური კომპლექსური ტაქტიკა. მკურნალობის მეთოდი, იქნება ეს კონსერვატიული თუ ქირურგიული, ირჩევა დიაგნოზის, დაავადების განვითარების მიზეზების, პათოლოგიური პროცესის სიმძიმის, მისი ხანგრძლივობისა და მასთან დაკავშირებული გართულებების არსებობის მიხედვით. კონსერვატიული მკურნალობის მეთოდი გამოიყენება ინფექციებისა და ჰორმონალური დისბალანსის საკორექციოდ. ჟორდანიას კლინიკის სპეციალისტები ოპერაციულ მკურნალობას თანამედროვე სტანდარტებით: ლაზერული და რადიოტალღური მეთოდებით ახორციელებენ. ეს მეთოდები საშუალებას გვაძლევს კონდილომები, პაპილომები, პოლიპები, და დისპლაზია აღმოვფხვრათ ეფექტურად, ნაწიბურების გარეშე, რადგან სპეციალისტს შეუძლია ზუსტად განსაზღვროს ექსპოზიციის სიღრმე ჯანსაღი ქსოვილის შეხებისა და დაზიანების გარეშე. ეს საშუალებას გვაძლევს მაქსიმალურად დავზოგოთ ქალის რეპროდუქციული ორგანოები.

რეაბილიტაცია

ჟორდანიას კლინიკაში ვიყენებთ თანამედროვე აპარატურას, რაც საშუალებას გვაძლევს ოპერაციები ჩავატაროთ იუველირული სიზუსტით. ეს ოპერაციები საჭიროებს ხანმოკლე რეაბილიტაციას. პროცედურის დამთავრების შემდეგ პაციენტები იმავე დღეს ტოვებენ კლინიკას და არ საჭიროებენ ჰოსპიტალიზაციას.

მე ჯანმრთელი ვარ

ქალისთვის ძალიან მნიშვნელოვანია ჯანმრთელობა ინტიმურ სფეროში, ეს გავლენას ახდენს როგორც ფიზიკურ, ასევე ფსიქოლოგიურ მდგომარეობაზე. ჟორდანიას კლინიკის სპეციალისტები და ტექნოლოგიები საშუალებას გაძლევთ სწრაფად და ეფექტურად მოიპოვოთ ფიზიკური და ფსიქოლოგიური ჯანმრთელობა.