მომზადება

• ჰორმონალური ანალიზები (ესტრადიოლი, ფოლიკულომასტიმულირებელი ჰორმონი, პროლაქტინი, პროგესტერონი, მალუთეინიზირებელი ჰორმონი, ანდროგენები, ფარისებრი ჯირკვლის ჰორმონები);
• რუტინული გინეკოლოგიური გამოკვლევა (საშოს ნაცხი, საშვილოსნოს ყელის ციტოლოგიური კვლევა, კოლპოსკოპია);
• გინეკოლოგიური ექოსკოპია;
• ანალიზი ინფექციებზე (ურეაპლაზმა, ქლამიდია, ჰერპესი, მიკოპლაზმა, ტრიქომონა, გონორეა, ადამიანის პაპილომავირუსი და ციტომეგალოვირუსი, აივ, სიფილისი, ჰეპატიტები, ტოქსოპლაზმა, წითურას ანტისხეულები);
• სისხლის ანალიზი (სისხლის საერთო ანალიზი, ბიოქიმიური, გლუკოზის განსაზღვრა, ჰემოსტაზის და სხვ.);
• შარდის გამოკვლევა (შარდის საერთო ანალიზი, შარდის ბაქტერიოლოგია);
• მამაკაცების გამოკვლევა გულისხმობს სპერმოგრამასა და ანალიზს ინფექციებზე. კონკრეტულ შემთხვევებში - კარიოტიპირება.

ოვულაციის სტიმულაცია

ორსულობის მისაღებად საჭიროა კვერცხუჯრედების განსაზღვრული რაოდენობის მიღება. ამისთვის ტარდება ოვულაციის სტიმულაცია ჰორმონალური პრეპარატებით, რისი ზემოქმედებითაც საკვერცხეში იზრდება ბევრი ფოლიკული. ექიმი რეპროდუქტოლოგი აკვირდება ფოლიკულების ზომებს ულტრაბგერითი მონიტორინგის მეშვეობით. როდესაც ფოლიკულები მიაღწევენ კონკრეტულ ზომას, ხდება მათი ასპირაცია.
ხანგრძლივობა : 8-14 დღე

კვერცხუჯრედების მიღება

კვერცხუჯრედის აღება ხდება ტრანსვაგინალური პუნქციის გზით, რომელიც ტარდება მსუბუქი ანესთეზიით, ამიტომ აბსოლუტურად უმტკივნეულოა. კვერცხუჯრედის მოპოვება აბსოლუტურად უვნებელია ქალის ორგანიზმისთვის.
ხანგრძლივობა: დაახლოებით 30 წუთი

სპერმატოზოიდების მიღება

მამაკაცი სპეციალურ პირობებში აბარებს ბიოლოგიურ მასალას შემდგომი ეტაპისთვის(საშვილოსნოს ღრუში შეყვანა). ბიოლოგიური მასალის ჩაბარებამდე რეკომენდებულია 2-3 დღიანი აბსტინენცია, 7-10 დღის განმავლობაში ალკოჰოლისა და გადამახურებელი ფაქტორების გამორიცხვა (მაგ. საუნა).
ხანგრძლივობა: 30 წუთი

ინ ვიტრო განაყოფიერება

კვერცხუჯრედების სპერმატოზოიდებით განაყოფიერება ხდება ინ ვიტრო პირობებში სპეციალურ სინჯარაში. განაყოფიერებული კვერცხუჯრედი - ზიგოტა 3-5 დღის განმავლობაში ყოვნდება სპეციალურ ინკუბატორში, რომლის პირობები მაქსიმალურად მიმსგავსებულია ქალის ორგანიზმის პირობებთან. 3-5 დღის განმავლობაში ემბრიოლოგი აკვირდება ემბრიონების მდგომარეობას მონიტორზე გამოტანილი ინდიკატორების მონიტორინგის მეშვეობით.
ხანგრძლივობა: 3-5 დღე

პრეიმპლანტაციური გენეტიკური ტესტირება

ემბრიოლოგი ემბრიოლოგიურ ლაბორატორიაში ატარებს გენეტიკურ კვლევას მე-3-5 დღის ემბრიონზე. ჯანსაღი ემბრიონის იდენტიფიცირების შემდეგ, ხდება მათი ამორჩევა საშვილოსნოს ღრუში გადასატანად. ემბრიონის გადატანა საშვილოსნოს ღრუში ხდება განვითარების მე-5-6 დღეს. გადატანის პროცედურა ხორციელდება სპეციალური ელასტიური კათეტერით. პროცედურა უმტკივნეულოა და ამიტომ არ საჭიროებს ანესთეზიას.
ხანგრძლივობა: 5-10 წუთი

მედიკამენტოზური მხარდაჭერა

ემბრიონის საშვილოსნოს ღრუში გადატანის შემდეგ, ორსულობის შესანარჩუნებლად 2 კვირის განმავლობაში ტარდება ჰორმონალური თერაპია.
ხანგრძლივობა: 14 დღე

ორსულობის დადასტურება

ჰორმონალური თერაპიის დასრულების შემდეგ ტარდება ორსულობის ტესტი, 10-12 დღის შემდეგ კი ორსულობის ულტრაბგერითი დადგენა.
ხანგრძლივობა: 24-28 დღე